Нгуен Тхи Чунг бала кезинен бери музыкага, өзгөчө этникалык музыкага кызыгып келет. Ошондуктан кыргыз элинин маданияты, салттуу обондору жана улуттук музыкалык мотивдери ага жакын болуп, өзгөчө кызыгуусун жаратат.
Дүйнөлүк көчмөндөр оюндарынын алкагында ал өз өлкөсүнүн музыкалык маданиятын таанытып, вьетнамдыктардын салттуу бир кылдуу музыкалык аспабы — дан бауда (Đàn bầu) ойноо чеберчилигин көрсөтүүдө.
Дан баунун үнү өзгөчө мукамдуулугу жана таасирдүүлүгү менен айырмаланат. Аспаптын уникалдуулугу ийилчээк таякчанын жардамы менен үндүн бийиктигин акырындык менен өзгөртүү мүмкүнчүлүгүндө. Музыкант аткаруу учурунда бир колу менен жыгач таякчанын жардамы аркылуу кылды башкарып, экинчи колу менен ийилчээк таякчанын абалын жөнгө салат. Мунун натыйжасында дан бауга мүнөздүү жумшак жана мукам үндөр жаралат.
Бүгүн Нгуен Тхи Чунг «Рух Ордо» маданий комплексинде өнөрүн тартуулап, анын аткаруусу көптөгөн чет өлкөлүк меймандардын жана Кыргызстандын тургундарынын көңүлүн бурууда. Көрүүчүлөр анын аткаруусун суктануу менен угуп, вьетнамдын дан бау аспабынын өзгөчө жана кереметтүү үнү менен таанышууда.
Нгуен Тхи Чунг үчүн Дүйнөлүк көчмөндөр оюндарына катышуу — Вьетнамдын бай музыкалык мурасын таанытуу мүмкүнчүлүгү гана эмес, ошондой эле Кыргызстандын жана башка өлкөлөрдүн маданияты менен жакындан таанышууга шарт түзгөн сонун мүмкүнчүлүк.
Бир чоң эл аралык аянтчада ар түрдүү салттар, тилдер жана маданияттар биригип, адамдарды искусство жана музыка аркылуу жакындатууда. Дал ушундай жолугушуулар элдердин ортосундагы достуктун жана өз ара түшүнүшүүнүн чыныгы көпүрөсүнө айланат.