Кумдан жаралган «Муун»: скульптор Алмаз Жамгырчиев өзгөчө өнөр тууралуу Ысык-Көл районунун Өрнөк айылында, Курманжан Датка атындагы Көчмөндөр цивилизациясы борборунун аймагында кум искусствонун өзгөчө материалына айланды. VI Дүйнөлүк көчмөндөр оюндарынын маданий программасынын алкагында бул жерде көлөмдүү кум скульптураларынын сериясы жаралды. Алардын бири — скульптор Алмаз Жамгырчиевдин «Муун» аттуу композициясы.
Скульптордун айтымында, анын кум менен иштөөсү 2016-жылы «Ысык-Көлдүн сыйкырдуу кумдары» аттуу симпозиумга катышканда башталган. Ошондон бери сүрөтчүлөр бул техниканы өнүктүрүп, кум жана топурак менен иштөөнүн салттуу ыкмаларын заманбап технологиялар менен айкалыштырып келишет. Скульптуралардын бекемдигин камсыз кылуу үчүн курамында атайын жабыштыргычы бар аралашма колдонулат.
Бүгүнкү күндө айрым кум композицияларынын бийиктиги жана узундугу беш метрге жакындайт. Алар сынактын негизинде тандалып алынган: сунушталган 20га жакын эмгектин арасынан мейкиндикти кооздоп гана тим болбостон, VI Дүйнөлүк көчмөндөр оюндарынын маданий тарыхынын бир бөлүгүнө айлана турган композициялар тандалып алынган.
Алмаз Жамгырчиев үчүн бул эмгектеги негизги нерсе — техниканын өзгөчөлүгү жана көлөмү гана эмес, жылдар өткөндөн кийин да көрүүчүгө ой салган чыгарма калтыруу мүмкүнчүлүгү. «Эгер биздин эмгектер тарыхтын бир бөлүгүнө айланып, адамдардын эсинде калса — биз, искусство адамдары үчүн, бул эң чоң жеңиш», — дейт скульптор. Ошентип, адатта убактылуулук менен байланышкан кум Өрнөктө муундун символуна жана VI Дүйнөлүк көчмөндөр оюндарынын эстелик белгисине айланууда.