Ысык-Көл, 2026-жылдын 3-сентябры. Курманжан Датка атындагы Көчмөндөр цивилизациясв борборунда VI Дүйнөлүк көчмөндөр оюндарынын алкагында уюштурулган «Көчмөндөр цивилизациясы: мурасы, парадигмасы жана келечеги” аттуу эл аралык илимий конференция өз ишин баштады.
Эл аралык конференцияга дүйнөнүн 28 өлкөсүнөн белгилүү окумуштуулар, изилдөөчүлөр, академиялык коомчулуктун өкүлдөрү, коомдук ишмерлер жана ардактуу коноктор катышууда.
Конференциянын расмий ачылыш аземи Кыргыз Республикасынын Мамлекеттик катчысы Арслан Койчиевдин, Түрк маданиятынын эл аралык уюмунун (ТҮРКСОЙ) Башкы катчысы Султан Раевдин, ЮНЕСКОнун колдоосу астында Азия-Тынч океан аймагындагы материалдык эмес маданий мурастар боюнча Эл аралык маалыматтык жана тармактык борборунун директору Доксун Кимдин куттуктоо сөздөрү менен башталды.
Конференцияга Кыргыз Республикасынын Илим, жогорку билим берүү жана инновациялар министри Гульзат Исаматова модераторлук кылды.
Кыргыз Республикасынын Мамлекеттик катчысы Арслан Койчиев өзүнүн куттуктоо сөзүндө көчмөн элдердин тарыхын, маданиятын жана цивилизациялык мурасын терең изилдөөнүн маанилүүлүгүн белгиледи.
«Көчмөндөрдүн мурасын сактоо коомубуз жана келечек муундар үчүн зор мааниге ээ. Дүйнөлүк цивилизациянын өнүгүшүнө кошкон салымын тереңирээк түшүнүү үчүн көчмөн элдердин тарыхын, уникалдуу тажрыйбасын жана цивилизациясын кеңири изилдөө зарыл. Бүгүнкү конференция жаңы идеялардын жаралышы, илимий диалогду өнүктүрүү жана академиялык кызматташтыкты чыңдоо үчүн маанилүү аянтча болуп саналат», — деп белгиледи Арслан Койчиев.
Конференциянын негизги максаты — эл аралык илимий жана академиялык кызматташтыкты чыңдоо, көчмөн цивилизацияларын изилдөө багытындагы илимий иштерди кеңейтүү, ошондой эле алардын маданий мурасын сактоо, изилдөө жана өнүктүрүү боюнча заманбап ыкмаларды калыптандыруу.
Конференциянын алкагында профессорлордун, ректорлордун, илимий кызматкерлердин жана ардактуу коноктордун катышуусунда эл аралык эксперттик сессия өтүүдө. Катышуучулар өздөрүнүн илимий изилдөөлөрүнүн жыйынтыктарын сунуштап, көчмөн цивилизацияларынын тарыхы, маданияты жана мурасы, ошондой эле алардын азыркы дүйнөдөгү орду жана мааниси боюнча актуалдуу маселелерди талкуулашууда.
Конференциянын катышуучуларынын арасында Словениядагы Любляна университетинин этномузыка таануу боюнча ардактуу профессору Сванибор Петтан жана АКШдагы Вермонт университетинин саясат таануу кафедрасынын доценти, PhD даражасына ээ Мишель Элизабет Коммерсио бар.
Конференциянын программасында көчмөн цивилизацияларын изилдөөнүн ар кыл багыттарына арналган сегиз тематикалык секциянын иши өзгөчө орунду ээлейт.
Секциялык жыйындардын жүрүшүндө катышуучулар көчмөн маданиятынын глобалдык цивилизациядагы ордун, көчмөн элдердин маданий мурасын сактоо жана жайылтуу маселелерин, көчмөн коомдордун саясий жана укуктук түзүлүштөрүн, археология жана антропология тармагындагы жаңы илимий ачылыштарды, салттуу спорттун түрлөрүн жана оюндарды, ошондой эле туруктуу өнүгүү, санариптештирүү жана маданий мурасты сактоо маселелерин талкуулашат.