Оюндар өтүп жаткан аянтчаларда медициналык пункттар, тез жардам бригадалары жана мобилдик госпиталь иштеп жатат
ЧОЛПОН-АТА, 2026-жылдын 2-сентябры. VI Дүйнөлүк көчмөндөр оюндарынын катышуучуларына, конокторуна, көрүүчүлөрүнө жана кызматкерлерине медициналык жардам көрсөтүү иш-чаралар өтүп жаткан бардык негизги аянтчаларда уюштурулду. Зарыл медициналык жардамды көрсөтүү үчүн медициналык пункттар, мобилдик медициналык комплекстер, тез жардам бригадалары жана мобилдик госпиталь тартылган.
2026-жылдын 27-августунан 2-сентябрына чейин Оюндар өтүп жаткан бардык аймактарда медициналык жардам алуу үчүн 507 адам кайрылган. Кайрылгандардын басымдуу бөлүгүнө зарыл медициналык жардам түздөн-түз жеринде көрсөтүлдү.
«Дүйнөлүк көчмөндөр оюндарынын аянтчаларында жүргөн катышуучуларга, конокторго жана бардык жарандарга медициналык жардам штаттык режимде көрсөтүлүүдө. Бардык зарыл медициналык кызматтар жеринде иштеп, ыкчам жардам көрсөтүүгө даяр. Катышуучуларды жана конокторду ден соолугу начарлаган учурда медициналык пункттарга өз убагында кайрылып, зарыл болгон консультацияны алууну кийинкиге калтырбоого чакырабыз», — деп белгиледи Кыргыз Республикасынын саламаттык сактоо министринин орун басары Гүлбара Ишенапысова. Өзгөчө көңүл катышуучулар менен коноктордун саны көп топтолгон Кырчын жайлоосундагы иш-чараларды медициналык коштоого бурулган. 27-августтан тартып бул жерде боз үйлөрдүн базасында алты медициналык пункт, ӨКМдин мобилдик госпиталы жана тез жардамдын 10 бригадасы иш алып барууда.
Жалпы кайрылуулардын ичинен 341 кайрылуу Кырчын жайлоосундагы медициналык пункттарга туура келет. Анын ичинен 126 кайрылуу ӨКМдин мобилдик госпиталы тарабынан кабыл алынган. Гүлбара Ишенапысованын айтымында, Кырчындагы кайрылуулардын басымдуу бөлүгү медициналык консультация алуу зарылдыгына байланыштуу болгон. Анын ичинде артериялык кан басымдын жана кандагы канттын деңгээлинин жогорулашы боюнча кайрылуулар катталган. Ошондой эле жеңил жаракат алган айрым учурлар катталган.
«Кырчын жайлоосунда медициналык жардам иш-чаралар өтүп жаткан аймактын өзүндө жеткиликтүү. Медициналык пункттар, ӨКМдин мобилдик госпиталы, мобилдик комплекс жана тез жардам бригадалары иштеп жатат. Зарыл болгон учурда адистер жардамды жеринде көрсөтүшөт же бейтапты тиешелүү медициналык уюмга андан ары жөнөтүүнү камсыз кылышат», — деди министрдин орун басары.
Ошондой эле ал Оюндардын катышуучуларын жана конокторун зарыл болгон учурда медициналык жардамга өз убагында кайрылууга чакырды. Дары-дармекке муктаж болгон коноктор үчүн Кырчын жайлоосундагы этнобазардын аймагында «Эл Аман» дарыканасынын пункту иштеп жатат.
VI Дүйнөлүк көчмөндөр оюндарынын алкагындагы мелдештер жана маданий иш-чаралар өтүп жаткан бардык аянтчаларда медициналык коштоо иштери улантылууда.