2026-жылдын 6-мартында Дүйнөлүк көчмөндөр оюндарынын Эл аралык катчылыгында Кытай Эл Республикасынын Кыргыз Республикасындагы Элчилигинин саясий бөлүмүнүн башчысы Ю Чжоулинь айым менен Дүйнөлүк көчмөндөр оюндарынын Эл аралык катчылыгынын жетекчисинин орун басары Белек Үсөнбековдун жумушчу жолугушуусу болуп өттү.
Жолугушуунун жүрүшүндө Белек Үсөнбеков VI Дүйнөлүк көчмөндөр оюндарына катышуу үчүн расмий чакыруулар мурда дипломатиялык каналдар аркылуу Кытай Эл Республикасынын спорт, маданият жана илим багыттарындагы негизги министрликтерине жана ведомстволоруна жөнөтүлгөнүн билдирди. Ошондой эле учурда кытайдын салттуу күрөш түрлөрүнүн бирин көргөзмө программага киргизүү маселеси каралып жатканы белгиленди. Бул демилге кытай күрөшүн эл аралык аренада мындан ары да илгерилетүүгө жана популярдаштырууга өбөлгө түзүшү мүмкүн. Ю Чжоулинь айым өз кезегинде КЭРдин КРдеги Элчилигинин атынан Кытай Эл Республикасынын делегациясынын VI Дүйнөлүк көчмөндөр оюндарына катышуусуна жогорку кызыгуусун билдирди. Кытай тарап спорттук команданын гана эмес, маданий жана илимий программалардын өкүлдөрүнүн да катышуу мүмкүнчүлүгүн карап жатканы белгиленди. Тараптар VI ДКОнун ачылышы Шанхай кызматташтык уюмунун Саммити менен катар өтөөрүн эске алуу менен, жигердүү кызматташтыктын маанилүүлүгүн баса белгилешти.