2026-жылдын 3-сентябрында Ысык-Көл облусунда VI Дүйнөлүк көчмөндөр оюндарынын алкагында «Көчмөн цивилизациялар: мурас, парадигмалар жана келечек» аттуу эл аралык илимий конференция өтөт.
Конференция Дүйнөлүк көчмөндөр оюндарынын негизги интеллектуалдык иш-чараларынын бири болуп саналат жана көчмөн цивилизациялардын тарыхый мурасын, философиясын, маданиятын, салттарын жана өнүгүүсүнүн заманбап аспектилерин ар тараптуу изилдөө үчүн илимий коомчулукту бириктирүүгө багытталган.
Масштабдуу илимий форум ачык академиялык диалог жүргүзүү, алдыңкы илимий билимдерди алмашуу жана ар кайсы өлкөлөрдүн изилдөө борборлорунун ортосундагы кызматташтыкты чыңдоо үчүн эл аралык аянтча болот.
Конференцияны өткөрүү Кыргыз Республикасынын көчмөн элдердин тарыхый-маданий мурасын сактоо, илимий жактан иликтөө жана эл аралык деңгээлде жайылтуу боюнча ырааттуу мамлекеттик саясатын чагылдырат.
Дүйнөлүк көчмөндөр оюндарынын илимий программасы номадологияны заманбап дисциплиналар аралык илимий багыт катары өнүктүрүүгө, эл аралык илимий кызматташтыкты чыңдоого жана көчмөн цивилизацияларды изилдөө боюнча глобалдык изилдөө платформасын түзүүгө багытталган.
Конференциянын ишине Кыргызстан, Казакстан, Россия, Кытай, Азербайжан, Түркия, АКШ, Австрия, Өзбекстан, Түштүк Корея, Улуу Британия, Индия, Бельгия, Франция, Жаңы Зеландия, Япония, Сауд Арабиясы, Венгрия, Гана, Германия, Италия, Монголия, Нидерланды, Пакистан, Польша, Словения, Швеция, Шри-Ланка жана Иранды кошкондо, дүйнөнүн 30га жакын өлкөсүнөн алдыңкы окумуштуулар, изилдөөчүлөр, эксперттер, эл аралык уюмдардын, жогорку окуу жайлардын жана илимий борборлордун өкүлдөрү катышат.
Конференциянын катышуучулары көчмөн цивилизацияларды изилдөөнүн актуалдуу маселелерин, алардын тарыхый жана маданий мурасын, философиясын, салттарын жана баалуулуктарын, ошондой эле номадологияны жана дисциплиналар аралык изилдөөлөрдү өнүктүрүүнүн заманбап ыкмаларын талкуулашат.
Эл аралык илимий кызматташтыкты кеңейтүүгө, биргелешкен изилдөө долбоорлорун өнүктүрүүгө, академиялык алмашууга жана ар кайсы өлкөлөрдүн изилдөөчүлөрү менен илимий борборлорунун ортосунда жаңы илимий байланыштарды түзүүгө өзгөчө көңүл бурулат.
Конференциянын VI Дүйнөлүк көчмөндөр оюндарынын алкагында өткөрүлүшү Оюндардын спорттук жана маданий гана эмес, илимий-интеллектуалдык маанисин да баса белгилеп, көчмөн элдердин цивилизациялык мурасын терең илимий иликтөөгө шарт түзөт. Конференциянын салтанаттуу ачылышы 2026-жылдын 3-сентябрында Ысык-Көл облусунун Өрнөк айылындагы Курманжан Датка атындагы Көчмөн цивилизация борборунда өтөт.
Эл аралык илимий конференция Кыргызстандын эл аралык илимий диалогду өнүктүрүүгө, академиялык кызматташтыкты чыңдоого жана көчмөн цивилизацияларды дүйнөлүк тарыхый-маданий мурастын маанилүү бөлүгү катары илимий изилдөөнү илгерилетүүгө кошкон олуттуу салымы болот.