Дүйнөлүк көчмөндөр оюндары 2026нын алкагында «Биримдик кербени» аймактык маданий долбоору башталат

«Биримдик кербени» долбоору — суунун Кыргыз Республикасы үчүн турмуштук баалуулугун жана Дүйнөлүк көчмөндөр оюндарындагы символикалык маанисин баса белгилеген улуттук Суу эстафетасы.

Кыргыз эли үчүн суу — жашоонун, тазалыктын жана муундар улашуусунун булагы. Оюндардын концепциясында ал биримдикти жана жаңылануну символдоштурат.

Долбоор өлкөнүн бардык аймактарын камтып, маданий байлыкты көрсөтөт жана улуттук биримдик идеясын бекемдейт. «Биримдик кербени» калкты VI Дүйнөлүк көчмөндөр оюндарына даярдык көрүүгө алдын ала тартып, ар бир аймакка бул эл аралык иш-чарага өз салымын кошуу мүмкүнчүлүгүн берет.

Долбоорду ишке ашыруу этаптары:

1. 2025-жылдын 31-декабрына чейин Кыргыз Республикасынын бардык аймактарында тандоо иш-чаралары өткөрүлүп, алардын жыйынтыгы боюнча төмөнкүлөр аныкталат:

• Аймактардын баатырлары — өлкөнүн ар бир аймагынын өкүлдөрү;
• Элчилер — аймактын өнүгүшүнө олуттуу салым кошкон белгилүү жана көрүнүктүү өкүлдөрү;
• Ыйык булак — аймактын эң белгилүү суу булагы (көл, дарыя, булак ж.б.).

1. 2026-жылдын июнунда Башкы Баатыр өлкөнүн Башкы идишин (Көөкөр) кыргыз элинин биримдигин символдоштурган суу менен толтуруу үчүн Хан-Теңири чокусунун мөңгүлөрүнө көтөрүлөт. Аземден кийин идиш Бишкек шаарындагы Башкы суу сактагычка жеткирилет.

Ошондой эле 2026-жылдын июнунан тартып ар бир аймакта аймактык идиштерди (Көөкөр) ыйык булактардын суусу менен толтуруу аземдери жана Сууну урматтоо аземдери өткөрүлөт. Аземдер аяктагандан кийин идиштер аймактык Суу сактагычтарга орнотулуп, алар аймактын тургундары менен конокторунун баруусу үчүн ачылат.

1. 2026-жылдын 15-августуна чейин Баатырлар аймактык идиштерди (Көөкөр) Бишкек шаарына жеткиришет, ал жерде алар борбордун тургундары менен коноктору үчүн ачык болгон Башкы суу сактагычка жайгаштырылат.
2. 2026-жылдын 31-августунда, VI Дүйнөлүк көчмөндөр оюндарынын салтанаттуу ачылыш аземи өткөн күнү, Башкы Баатыр, аймактардын баатырлары жана Элчилер салтанаттуу Кербендин курамында аземге катышуу үчүн «Азаттык-Арена» стадионуна багыт алышат.

Ачылыш аземинин жүрүшүндө Кыргыз Республикасынын бардык аймактарынан чогултулган суу куюлган идиштер (Көөкөр), ошондой эле катышуучу өлкөлөрдүн делегациялары алып келген суу элдердин ортосундагы биримдикти, ынтымакты жана өз ара урматтоону символдоштурган Бирдиктүү идишке салтанаттуу түрдө бириктирилет.